“ЖЫЛДЫН МЫКТЫ ТАРБИЯЧЫСЫ-2025” КАРОО-СЫНАГЫ ЖЫЙЫНТЫКТАЛДЫ

 Жалал-Абад шаардык билим берүү бөлүмүнүн демилгеси жана шаардык мэриянын колдоосу менен өткөрүлгөн «Жылдын мыкты тарбиячысы - 2025» кароо-сынагынын жыйынтыгы чыгарылып, жеңүүчүлөр аныкталды.

 Ага Жалал-Абад шаардык билим берүү бөлүмүнүн алдындагы окуу-усулдук кабинетинин башчысы Акылбек Таңатаров, бала бакча кызматкерлери жана коноктор катышты.

 “Жылдын мыкты тарбиячысы-2025” кароо-сынагына шаардагы 16 бала бакчанын кызматкери катышты.

 Аталган кароо-сынак боюнча жалпы төрт номинация каралган: “2025-жылдын мыкты тарбиячысы”, “2025-жылдын мыкты мамлекеттик тил мугалими”, “2025-жылдын мыкты усулчусу”, “2025-жылдын мыкты музыкалык жетекчиси”.

 Аталган сынакта алдыңкы орундарды жеңген тарбиячылар баалуу белектер менен сыйланышты.

 Кароо-сынактын максаты - шаардагы мектепке чейинки билим берүү мекемелеринин иш-мерчемдерин жайылтуу, окуу-тарбия иштерин уюштуруу жана өстүрүү үчүн шарт түзүү болуп саналат.

 Белгилей кетсек, шаардык этептан өткөн жеңүүчүлөр облустук турга катышат.