Жалал-Абад шаарынын делегациясы Орусиянын Красноярск шаарына барды

 XI орус-кыргыз аймактар ​​аралык конференциясына даярдык көрүү жана боордош шаар мамилелерин түзүү боюнча Меморандумду ишке ашыруунун алкагында Жалал-Абад шаарынын мэринин биринчи орун басары Кубанычбек Иманалиев баштаган делегация Красноярск шаарына барды.

 Делегация бир нече күн бою аталган шаардын калкты жылуулук жана суу менен камсыз кылууну уюштуруу, интеллектуалдык транспорт системасынын иши, шаарды көрктөндүрүү маселелери менен таанышты. Ошондой эле, Красноярск шаарындагы мекендештерден кабар алып, бир катар билим берүү жана маданий жайларында болушту. Анын алкагында №16 орто мектебинде билим алып жаткан кыргызстандык окуучулардын ийгиликтерине күбө болуп, билим берүү тармагындагы өзгөчөлүктөр, эки шаардын мектептеринин ортосундагы достук маселеси талкууланды.

«2007-жылдан бери биздин мектепте мигрант балдарды адаптациялоо боюнча облуста жалгыз кошумча билим берүү борбору иштеп келет. Анда балдарды бири-биринин каада-салтын урматтоого жана алардын менталитетине сабырдуу болууга үйрөткөн ар кандай иш-чаралар өткөрүлөт. Чет тилдеги балдар окууга абдан ынталуу," — деди мектеп директору Людмила Жарич.

Жалал-Абад шаарынын мэриясынын делегациясынын башчысы, мэрдин биринчи орун басары Кубанычбек Иманалиев, Красноярск шаарынын башчысына меймандостугу жана натыйжалуу өз ара аракеттенүүнү улантууга даярдыгы үчүн ыраазычылык билдирди.

«Сизге Красноярскиден жылуу кабыл алуу жана унутулгус таасирлер үчүн рахмат! Биз сиздердин шаардын кооздугуна, анын тургундарынын меймандостугуна таң калдык. Тилекке каршы, ушундай кыска убакыттын ичинде биз каалаган нерсенин баарын үйрөнүп, көрө албадык, бирок июль айындагы кезектеги иш сапарыбыз дагы көп ачылыштарды жасоого мүмкүндүк берет деп ишенебиз,” – деп белгиледи.

Ал эми Краноярск шаарынын башчысы Владислав Логинов:

«Биздин шаарлардын ортосундагы достук акырындык менен өнүгүп жатат, бирок биз биргеликте эки шаардын жана өлкөнүн тургундарынын жыргалчылыгы үчүн маанилүү долбоорлорду ишке ашыра аларыбызга ишенем», - деп белгиледи Кубанычбек Иманалиев менен болгон маегинде.

 Белгилей кетсек, Жалал-Абад шаары менен бир тууган шаар мамилесин түзүү боюнча меморандумга былтыр октябрь айында кол коюлган.