ЖАЛАЛ-АБАД ШААРЫНДА КАПИТАЛДЫК ОҢДОП-ТҮЗӨӨДӨН ӨТКӨРҮЛГӨН РЕАБИЛИТАЦИЯЛЫК БОРБОР ПАЙДАЛАНУУГА БЕРИЛДИ

 Жалал-Абад шаарынын М.Конгантиев атындагы аймактык башкармалыгында бир топ жылдардан бери иштебей турган ден соолугунан мүмкүнчүлүгү чектелген балдардын реабилитациялык борбору капиталдык оңдоп-түзөөдөн өткөрүлүп, пайдаланууга берилди.

 Иш-чарага Жалал-Абад шарынын мэри Эрнисбек Ормоков, Жалал-Абад шаардык депутаттар кеңешинин төрагасы Орозбек Турдубеков, ЮНИСЕФ тин Кыргызстандагы өкүлү Самман Джунг Тапа, борбордун эмгек жамааты жана жергиликтүү тургундар катышты.

 Шаар мэри Эрнисбек Ормоков: "Камкордукка муктаж жарандарды коомдук жашоого толук аралаштыруу жана алардын турмуш шартын жакшыртуу биздин эң негизги милдеттерибиздин бири! Андыктан, бул жайда эмгектенген ар бир кызматкер мында келген балдарга жана алардын ата-энелерине аяр мамиле жасап, жогорку кесипкөйлүк менен кызмат көрсөтүшү зарыл. Анткени, өзгөчө муктаждыктары бар жарандар коомдун ажырагыс бөлүгү катары каралат жана ар дайым мамлекеттин көзөмөлүндө болот,"- деп баса белгиледи.

 Ошондой эле, борборду оңдоп-түзөөгө салым кошкон ЮНИСЕФтин Кыргызстандагы өкүлү Самман Джунг Тапага ыраазычылык билдирип, шаар бийлиги элибиздин жашоо-турмушун жакшыртууга багытталган бардык долбоорлорду колдоого алып, демөөрчүлөр менен тыгыз кызматташууга ар дайым даяр экенин билдирди.

 Белгилей кетсек, аталган борбор Жалал-Абад шаарынын мэриясынын “Үй-бүлөгө жана балдарга жардам берүү” кайрымдуулук борборунун карамагына өткөрүлгөн. Учурда борбордо ден соолугунан мүмкүнчүлүгү чектелген балдардын массаж алып, логопеддин жардамын алып, ден соолуктарын чыңдоосуна шарт түзүлгөн.