Жалал-Абад шаардык кеңешинин кезектеги сессиясы өттү

Бүгүн, 17-январда Жалал-Абад шаардык кеңешинин кезектеги сессиясы өттү. Ага шаардык кеңештин төрагасы Нуртилек Орозбаев, шаардык кеңештин төрагасынын орун басарлары Автандил Дүйшеев, Айзат Рамматиллаева, мэриянын аппарат жетекчиси Эрнист Зияйдинов, шаардык кеңештин депутаттары жана мекеме-ишканалардын жетекчилери катышты.

Күн тартибинде жалпы 6 маселе каралды.

1. Жалал-Абад шаардык кеңешинин төрагасынын 2022-жылы аткарган иштери жөнүндө отчётун угуу жана 2022-жылы кабыл алынган токтомдордун аткарылышы тууралуу маалымат.

2. Жалал-Абад шаардык кеңешинин туруктуу коммиссияларынын отчёту.

3. Жалал-Абад шаарынын экономикалык-пландоо зоналарынын К³ зоналык коэффицентин бекитүү жөнүндө.

4. Жалал-Абад шаарынын З.Жамашев көчөсүндөгү 135-дарегинде жайгашкан муниципалдык көп кабатуу турак жай жөнүндө.

5. Жалал-Абад шаарынын Т.Тайгараев аймактык башкармалыгындагы мүлктү бузууга уруксат берүү жөнүндө.

6. “Жалал-Абад шаарынын аймагындагы мамлекеттик жана жеке менчик бала бакчалардын санитардык абалы, азыктарынын сакталышы, гигиеналык ченемдердин сакталышы жана балдардын тамак-ашынын сапатын кароо жөнүндө” тактамасы.

Алгач, шаардык кеңештин төрагасы Нуртилек Орозбаев Жалал-Абад шаардык мэриясынын жана шаардык кеңештин Ардак Грамотасын депутаттар Улукбек Мирзабаев, Жумабек Мамыров, Назгул Айдаровага тапшырды.

Сессиянын жүрүшүндө күн тартибине киргизилген маселелер ирети менен талкууланып, шаардык кеңештин төрагасынын 2022-жылы аткарган иштери жана 2022-жылы кабыл алынган токтомдордун аткарылышы боюнча маалыматын угушту. Ошондой эле мамлекеттик жана жеке менчик бала бакчалардын санитардык абалы, азык-түлүктөрдүн сакталышы, санитардык-гигиеналык талаптарга жооп бербегендиги боюнча туруктуу социалдык комиссияга мүчө депутаттар тарабынан маселе көтөрүлүп, шаардык билим берүү бөлүмүнүн жетекчисине тапшырмалар берилди.

Ар түрдүү маселелердин алкагында эл өкүлдөрү Курманбек көчөсүндө жайгашкан жаңы ачылган муниципалдык базардын толук кандуу иштебей жатышы боюнча маселе көтөрүштү. Базардын толук кандуу иштеп кетүүсү үчүн натыйжалуу иш-аракеттер көрүлүүсү керектиги айтылып, Керек-жарак рыногу жана кызмат көрсөтүү департаментинин жетекчисине ушул жылдын март айына чейин мөөнөт берилди.

Сессиянын соңунда Т.Тайгараев аймактык башкармалыгындагы имаратты бузууга уруксат берүү боюнча маселени комиссиянын кароосуна кайтарышты. Ал эми жогорудагы калган 5 маселе суроо-сунуштар менен депутаттар тарабынан колдоо тапты.