18 март 2023
Кароолор: (51)
Жалал-Абад: Экопаркка 1300 даана каштан дарагынын көчөтү отургузулду

Бүгүн, 18-мартта Жалал-Абад шаарындагы Ж.Бакиев атындагы экопаркка 1300 даана каштан дарагынын көчөтү тигилди. "Жашыл мурас" өнөктүгүнүн жана үч айлыктын алкагында өтүп жаткан ишембиликке КР Президентинин Жалал-Абад облусундагы ыйгарым укуктуу өкүлү Абсаттар Сыргабаев, Жалал-Абад шаарынын мэри Эрнисбек Ормоков, шаардык кеңешинин төрагасы Нуртилек Орозбаев баштаган депутаттар, шаардагы мекеме-ишканалардын, окуу жайлардын кызматкерлери жана студенттер катышты.
Шаар мэри Эрнисбек Ормоков, 2023-жылы “Жашыл мурас” өнөктүгүнүн алкагында Жалал-Абад шаарына 4475 даана көчөт отургузуу пландалганын, быйыл калааны көрктөндүрүү, жашылдандырууга басым жасалаарын белгилеп, шаар тургундарын жана мекеме-ишканалардын кызматкерлерин ишембиликтерге активдүү катышууга чакырды.
Эске салсак, аталган парк 2008-жылы Ж.Бакиев атындагы фондго 49 жылдык мөөнөткө парк катары пайдаланууга ижарага берилген. Бирок, келишимдин талаптары толук аткарылбай, парк кароосуз калгандыктан бир нече күн мурда мэрия паркты Муниципалдык менчиккке кайтарган.
Алдыда шаар тургундары жана коноктору эс ала турган заманбап паркка айлантуу боюнча жергиликтүү бийлик тарабынан иш-аракеттер жүргүзүлмөкчү.
Комментарий кошуу
Комментарий калтыруу үчүн каттоодон өтүңүз
же соцтармактар аркылуу кириңиз